دروصف قوم لر به سبک .خدایا چی بَکیمو اَفتاونَشینَه
کُر لُر سَنگَر گَرَت سی دوشمَنونَش
سَنگر هالی نَکَنَ قیمَت جونَش
بَرنویا هان ورداشتَه سی روز تَینشو
هر زَمونی دوشمنی بیا وَ جَینشو
کُر لُر شَین قَطارَن بَسَه دَ کَمَر
چی شیری ها نَشیسَه دَمینَ سَینَر
اَصالَتُ وا شُجاعَتُ وا مَردُمداری
مَنَنَه سی قوم لَر و یادَگاری
قوم لُر دَگُذَشتَه دارَه نَشونَه
دوشمَه شکار ویدَنَ حونَه وَحونه
خُدایا رَحمی بَکو وی قومِ نومدار
دَ دامِ هیچ دوشمَنی نووَه گَرفتا ر
شاعرمحرم ولیپور یعقوبوند
دل بی دلدار
دلی دارم ئو دلدارش نوینم.
تک و تینا منه ، یارش نوینم.
چی اسب سرکشه ای دلِ ناشی.
لغومش وا گُل اُسارش نوینم.
پلنگه که صیاد منه وِ سر رُوش.
کمرش بینم و غارش نوینم.
شیریه که تش رَتَ دِ بیشزارش.
یال و کوپالِ نازارش نوینم.
دلن و نرخِ مفت نیامه وِ حراج.
صد افسوس که خریدارش نوینم.
چی قالی نیمه کاره ای دل مه.
ولی کرکیت و تمدارش نوینم.
دلم سی دوسکم گیره بهونه.
خُوشیش بینم و آزارش نوینم.
چی بیمارِ گرو وِ سرِ تلمیت.
ری وِ مُوت و پرستارش نوینم.
سوزِ سرما داره بازار خراوم.
سیچی گرمیِ بازارش نوینم
خدا غصه دوتا کرده ای گُردم.
غمش دارم اُ غم خوارش نوینم.
سینم کاخ و دلم کز کرده بُنش.
آخ که سلطونِ تاجدارش نوینم
شعر مولا ناصری
بیاای دوس
بیا ای دوس بیا وارِس وِ دردم
بیا تاسیت بوئم دِ آه سردم
اگر دوسیت هنی مَنَه وِ سر جاش
بیا بَنشی اُ تو گوش بی وِ حرفیاش
اگر دوسی هنی هم بر قراره
بیا تعریف بکو سی مه دِواره
بیا سیم بو د تعریف یا قدیمی
کجا رتن اُ دوسیا کی صمیمی
تک و تینیا چنو مَنمَه دِ مالگه
نه خُو مَنَه نه گَن مَنه وِ جاگه
کریمی اندیمشک
جاگه: جایگاه
#شعرلری_بالاگریوه
عیدبی_یار
عیدوماخدایا،اما نیوما یارم
گل یادش الهی برده همه قرارم
بادوبارون ناله پریشوکردخیالم
زمستونی سوزکرده خدایا دبهارم
درخت بیقراری ،ریشه زده دجونم
ثمرش بی گریوه الهی سی شوگارم
باغبون بیکسی ،تکیه زده سرشونم
چش دلم خینی کرده غمیاروزگارم
ستاره غصه نوکرد دآسمونه بختم
زونوی غم گرته هردوچش انتظارم
هرجمعه دل وه طماع تابرسه هنارس
دلخوشیام بارکرده وقتیکه یاری نارم
علیارته قرارش د ای دنیای ناراس
عیدمه روزیکه یار بیا وا دیارم
بیامهدی زهرا که طاقتم رومسه
بس که منم انتظار بسکه جمعه شمارم
شاعروتحلیلگرسیاسی
علی سرابی یاقوند اندیمشک
گروه شاعران دیاربالاگریوه