وبالا گریوه سلام رسونم
وِهمه ایلا وکُل دوسونم
دگپ تا کوچک ارادت دارم
سیتو بسازه پرورد گارم
تقلا کُنیت سی زِوون دا
ای مسئولیت حا دِ مِل شما
هر کوم وِ گوشید هر کوم اِشنویِت
وِ زِوون دا حرفیاتون بویِت
ار وِ اصالت افتخار داری
ار وِ اتحاد اشتهار داری
بیشدر وِ هینه بستگی داره
که سُس نکُنیت و ای گوتاره
نومتو وِخویی ار کسی بوئه
وسر بِلنی اسمتو در روئه
وا زِوون دا کُنیت هَچایه
خیلی آسونه هرکه بهایه
زِوونِ لُرّی زِوون دِرّیه
ریشَشو اصیل اُ مادریه
کتاو لُغتِیا بی شک وگمو
بیشدر مه دیمه وِ زِوون خومو
هرکس فکر کنه که کلاس داره
وا زِوون دا گوتاره ناره
چی آو مالکی هی حا دِ ری آو
دونم بیار نی چونکه حا وِ خواو
اصالت خوشن فراموش کرده
وِ دس نا محرم دس ودس گرده
اما مه دونم پیایا خوخو
وِزِوون دا کُنِن گفتکو
بالا گریوه افتخار داره
هرگس دل نِنیه دِ ای گوتاره
شاعر: ماشالله کریمی از اندیمشک
مدروزگار
روزگار مُدشَه که ها زِنَه دور
ایما بَنَیا هم ها کَشیم جُور
بهار گُذریه وا آو اُ هَواش
تاوسو وا گرما ، یائه وِسِر جاش
هه ادامه دییَه و ای گُذرش
پائیز ها دِ ره بیا پشت سرش
تا چَش دی و یَک پائیزن بینی
زِمسو یا گیرَت ، چی دُشمن خینی
چِهار فصل سال ، هه وِ دور گَردن
دِلیان باز بینی ، که پُر دِ دَردِن
بَنَه بیچاره ، دائِم کَشه جور
هه زَحمَت کَشه تا روئه دِقُور
پنجعلی پاپی
دردعاشق
دَردِ عاشُقی گِرونُ و شیری
جِگرت سوزنه تا،سِنِ پیری
اَگر سِکته کُنی لِتو وا زُونِت
حَرفِ خوتِن زَنی و چَشِ گِریونِت
عِشق یه طَرَفه ، چی جویِباری
که هه وِل روعه وِصَحرای ِ هُماری
که باغی ناشتوعَه اُ بِیه آوش
مَگر شویه ،که او بِینه وِ خاوئِش
عاشوقی دِ وَختی سوخت سخونِش
گِره هَرد عِشق ، راسیهِ وِ جونِش
چنان بایَد وِ پایِ یَک بَمیرن
که هیچ ایراد وِ یَکتری نَگیرن
هَر عِشقی دو طرف با اُستواره
جدایی شو فقط ،روز مرگ واگُذاره
دو دِلدارِن خوعه بَنی دِ یِ قور
دئ دیری یَکتری ،، نَکَشن جور
شاعر: پنجعلی پاپی